Tema 3. Estratexias de comunicación. A comunicación oral e escrita e o seu tratamento na aula. Procedementos para o fomento das habilidades comunicativas na aprendizaxe de linguas estranxeiras (Cristina)

Estratexias de comunicación. A comunicación oral e escrita e o seu tratamento na aula. Procedementos para o fomento das habilidades comunicativas na aprendizaxe de linguas estranxeiras.

Na aula, abordamos o tema 3 durante tres sesións moi completas. Nestas tres sesións, houbo algunha teoría mais sobre todo houbo moita práctica. Estivemos aprendendo distintas estratexias de comunicación, actividades para a produción oral e escrita e o seu tratamento na aula.

Para comezar a unidade, a docente pediunos que definiramos en grupos catros conceptos. Despois, comentámolas para chegar a unha definición común e asegurarnos de que todos e todas entendiamos os catro termos. Deixo por aquí as definicións que fixen xunto co meu grupo:

Ao rematar esta posta en común, a docente explicounos en detalle en que consiste a mediación, un concepto novo para nós e que cada vez está cobrando máis importancia no proceso de ensinanza-aprendizaxe. Aprendemos que hai distintos tipos de mediación (de textos, de conceptos e de comunicación), así como as distintas estratexias para traballalas nas clases. Nesta sesión, non só se explicou o que era a mediación oral e escrita senón que tamén puidemos ver distintas actividades e aprendemos como introducilas nunha aula. A docente ensinou vídeos e textos e tivemos que identificar o tipo de mediación e o propósito que se quería conseguir coa actividade. Penso que isto foi importante, xa que despois da explicación dun concepto descoñecido para nós, como é o caso da mediación, creo que o labor do profesor ou profesora é asegurarse de que o alumnado o entendeu. A visualización de textos reais fixo que puideramos identificar a mediación dun xeito máis doado, así como nos facilitou ideas para introducir estas actividades na aula. Moitas veces penso que o docente pode chegar a ter problemas á hora de levar a cabo unha actividade, polo que ter ideas previas de como introducila pode facilitarme moito o traballo como futura docente. 

Na segunda sesión, seguimos a traballar coa mediación pero neste caso fomos nós os encargados de deseñar a nosa propia actividade. Esta tarefa realizámola en grupos de catro persoas, compartímola nun documento conxunto de toda a clase e presentámola ante os compañeiros e compañeiras. No meu grupo, propuxemos unha actividade de parellas na que un era un alumno español mediando cun alumno de Reino Unido para chegar a un acordo de que película ver, que día e a que hora. Pensamos que traballar co tema do cine podía ser interesante e motivador para o alumnado. Ademais, xa que moitos institutos reciben alumnado de Reino Unido, pensamos que é unha boa oportunidade para que utilicen estas actividades de mediación nunha situación real. Considero que estas actividades poden ser beneficiosas para o alumnado, xa que lles dá ferramentas e experiencia para desenvolverse con éxito en distintas ocasións da vida cotiá.

Para rematar a sesión, traballamos coas actividades de comprensión oral e escrita. A docente citou algo que me chamou a atención e que as veces esquésecenos: dar recursos ao alumnado. É importante que como docentes aconsellemos ao alumnado a ler e escoitar para que melloren as súas habilidades en lingua estranxeira. Algúns exemplos das recomendacións que se lle poden facer son: ver series dobradas, escoitar audiolibros, usar libros electrónicos, entre outros. Non nos debemos de esquecer de remarcar a importancia destas pequenas accións, que as veces damos por suposto e son clave para a adquisición dunha lingua. Algo que tamén considero interesante e que aprendín na sesión é a como deseñar unha actividade de comprensión oral e escrita. Creo que os profesores poden ter certo “medo” á hora de decidir o tipo de texto ou audio que utilizar, xa que é complicado determinar o nivel e crear unha tarefa previa e unha posterior. Outro aspecto que me preocupa como futura docente é como saber si o alumnado comprende realmente o texto. É por isto que me axudou as ideas que deu a docente de pasar polas mesas escoitando ou vendo onde o alumnado ten máis dúbidas para despois abordalo, sen parar en detalles que todo o alumnado xa entendeu.

Na terceira sesión, a docente explicou como se deseñan actividades de produción e interacción escrita e oral. Por unha banda, no que atinxe á produción escrita, falamos dos distintos pasos que o alumnado debe seguir (planificación, primeiro borrador e versión final). É importante explicarlle ao alumnado a estruturación do texto que deben elaborar para que non teñan a sensación de estar perdidos. Pareceume moi interesante o que comentamos na clase sobre como dinamizar estes tres pasos dentro da aula, xa que saíron algúns exemplos como que os alumnos e alumnas poden correxirse entre eles mesmos ou poden traballar en grupos para crear unha choiva de ideas. Este tipo de métodos poden dinamizar moito as actividades e axudar ao alumnado á hora de redactar.

Para centrarnos máis neste tema da produción escrita, tivemos que dividirnos en grupos e crear unha actividade. A miña parella e mais eu creamos unha actividade na que o alumnado debía narrar unha experiencia relacionado co entroido, escribila nunha cartolina e colocala nun mural no corredor para que os demais compañeiros e familiares o puidesen ver. Despois decidimos a avaliación deste exercicio e isto fíxome reflexionar bastante, chegando a distintas conclusións. Penso que neste tipo de actividades non é necesario poñer unha cualificación numérica, creo que dar ao alumnado feedback é máis proveitoso. Podemos comentar certos erros para que melloren mais non debemos corrixir absolutamente todo, xa que o alumnado entenderá que o seu esforzo non pagou a pena. Xa que este tema paréceme interesante, busquei máis sobre el e atopei este vídeo que amplía máis a información:

Para traballar coa produción oral, a docente enviounos un correo cun enderezo a unha páxina web que contiña distintas actividades para traballar a expresión oral. Individualmente, tivemos que elixir unha e explicarlla a tres persoas que tiñan páxinas webs distintas. Esta tarefa gustoume moito, xa que as páxinas contiñan actividades diferentes e breves, que se poden aplicar nunha clase. Despois desta sesión seguín investigando e atopei este vídeo que da algunhas ideas de como facer que o alumnado se lance a falar inglés, igual vos axuda tamén!

En conclusión, penso que coñecer distintas actividades como as vistas nas clases é beneficioso para o docente, xa que non necesitará de improvisación e terá recursos suficientes. Finalmente, gustaríame remarcar a importancia de motivar ao alumnado e dun bo ambiente na aula para que este se solte a utilizar a lingua estranxeira sen pasar vergoña. Deixo por aquí un vídeo para concluír que explica algunha idea que pode ser útil como futuros docentes!