Tema 6. As programacións didácticas vixentes (Gonzalo)

 As programacións didácticas vixentes

Na sesión dedicada á unidade 6, tratamos distintos aspectos realmente interesantes. Estivemos a falar dun tema que persoalmente considero moi importante e do que ata ese momento non tiña demasiada información, as oposicións. Máis concretamente, falamos do proceso de acceso a estas oposicións e o seu baremo. Ademais, falamos máis sobre as distintas partes da oposición ás que nos teremos que enfrontar se queremos presentarnos nun futuro a estas en Galicia. Finalmente, traballamos con programacións didácticas e tivemos que realizar unha entre todo o grupo-aula.

Con respecto ás oposicións, axudoume moito a explicación do docente, xa que persoalmente gustaríame presentarme próximamente. Entre todos, limos as diapositivas e comenzamos un diálogo no que se podían facer preguntas sobre o que non quedaba claro. Deste xeito, tivemos a oportunidade de preguntar o que nos interesaba ou as dúbidas que tiñamos sobre isto, e quen mellor que o profesor para responder. Agradezo enormemente que se tratara este tema na aula, xa que creo que ao igual que a min, pode interesarlle a moita xente.

Sorprendeume bastante o documento sobre o baremo e a puntuación que dan a cada mérito. Por exemplo, eu sabía que se outorgaban puntos por ter certas certificacións de idiomas mais non sabía canto, polo que ter este baremo con nós para poder consultalo é sumamente importante. Ademais, non coñecía con exactitude en que consistían as distintas partes da oposición como por exemplo a primeira proba relacionada co nivel de inglés. É importante ser conscientes das probas e partes que teremos que superar á hora de presentarnos a estas oposicións, polo que esta sesión considéroa realmente útil.

Na segunda parte da clase, centrámonos nas programacións didácticas. A tarefa que nos encargou o docente tiña dúas partes. Primeiramente, tivemos que elaborar en grupos as distintas partes dunha programación didáctica que despois xuntamos. Deste xeito, conseguimos unha programación completa e preparada para levarse a cabo. Para realizar esta tarefa, tivemos que utilizar unha ferramenta chamada Mentimeter na que puidemos votar para decidir a materia e o curso no que basear a nosa programación e posterior unidade didáctica. Persoalmente, non coñecía esta ferramenta mais considero que pode ser moi efectiva nas aulas. Gustoume moito, xa que é unha forma de involucrar ao alumnado e que este poida tomar certas decisións á hora de traballar nas clases. Sen dúbida, gardo esta idea para cando sexa docente e considere necesario que o alumnado exprese as súas preferencias, como se fixo neste caso. Ademais, o feito de que cada grupo se ocupase dunha parte pareceume unha moi boa idea, xa que unha programación enteira para cada persoa ou minigrupo é bastante cantidade de traballo. Deste xeito, cada grupo centrouse nunha soa parte, polo que puido analizala e deseñala en máis detalle. No meu grupo, tivemos que traballar coas actividades complementarias. A verdade é que non sabía moito sobre que tipo de actividades se podían incluír aquí mais ao buscar máis información, atopamos distintas ideas como charlas, entrevistas ou algún que outro proxecto.

A segunda parte consistiu en facer unha unidade didáctica, neste caso individualmente, axudándonos da programación realizada por nós previamente. A idea era que nos inspirásemos na programación que fixemos entre todos para que nos resultase moito máis doada a actividade. Aínda que nos podíamos basear nesa programación para facer a nosa unidade, ao ter feita unha unidade para a materia de Deseño Curricular, puiden aplicar moitos dos elementos que xa tiña pensados e creados. Na unidade realizada para a outra materia, tivemos que incluír moitos aspectos e elementos que non son necesarios nas oposicións. De feito, para as oposicións debemos deseñar quince unidades didácticas que deben ocupar unhas sesenta páxinas en total e a miña primeira unidade didáctica ocupa unhas trinta páxinas aproximadamente. Si, en definitiva, debemos reducir estas unidades e poñer unicamente a información relevante. A realización desta unidade axudoume bastante a saber que é o que se pide no contexto das oposicións e así axustarme máis á normativa. Déixoa por aquí por se a queredes consultar:

Esta clase axudoume moito a entender mellor o proceso das oposicións, tanto o procedemento para acceder como as probas que se deben realizar. Penso que este tema pódelle interesar a moito alumnado deste Mestrado, polo que traer este tema ás aulas é unha boa idea. En moitos casos, este alumnado quere facer oposicións ao seu remate e creo que pode ser de axuda este tipo de explicacións. Tamén, hai moito alumnado que non sabe o que vai facer despois de rematar o ano, polo que sempre está ben dar a coñecer as distintas opcións que hai como é, neste caso, a oposición. Ademais, as programacións e as unidades didácticas son moi importantes nas oposicións, xa que son unha parte obrigatoria. Deste xeito, a realización destas dúas facilita moito o traballo que teremos que facer na súa preparación. Por unha banda, axúdanos a coñecer como é o proceso de realización tanto da programación como da unidade e por outra banda, estas unidades que estou realizando, xa me serven para utilizalas nun futuro.